Ресей, Украина мен АҚШ делегациялары Стамбұлға барады
2025 жылдың 15 мамырында Стамбұлда маңызды кездесу өтпек – Ресей өкілдері келеді. Украина мен АҚШ делегациялары да шақырылған, деп хабарлайды KazTaspa.kz.
Ресейлік БАҚ-тың мәліметінше, Ресей делегациясы сәрсенбі күні, 15 мамырда Стамбұлға келеді. Ресей президентінің баспасөз хатшысы Дмитрий Песков мәлімдеді: ресейлік тарап украиналық делегацияны күтеді. Алайда делегация құрамының нақты тізімі әзірге жарияланған жоқ.
Бұл кездесу тараптар арасындағы ықтимал саяси диалогқа бағытталған тағы бір қадам болуы мүмкін.
Украина кез келген жерде келіссөз жүргізуге дайын
Украина президенті Владимир Зеленский бұған дейін Түркия президенті Режеп Тайып Ердоғанмен Анкарада кездесуге келіскенін мәлімдеген болатын. Алайда, егер Владимир Путин кездесуді Стамбұлда өткізгісі келсе, украин делегациясы да сол жерге баруға дайын.
«Біз Путинмен кездесу үшін бар күшімізді саламыз. Бітім жасау туралы шешімді тек ол ғана қабылдай алады»,
Келіссөзге АҚШ та қосылуы мүмкін
Алдын ала мәліметтерге сәйкес, келіссөздерге АҚШ өкілдері де қосылуы мүмкін. Дональд Трамп Сауд Арабиясындағы инвестициялық форумда, АҚШ Мемлекеттік хатшысы Марко Рубионың Стамбұлға барғалы жатқанын айтты. Трамп бұл кездесуден «елеулі оң нәтижелер» күтетінін де атап өтті.
Батыс басылымдарының хабарлауынша, Трамптың арнайы өкілдері – Стив Уиткофф пен Кит Келлог та Түркияға барады.
Стамбұлда өтетін бұл кездесу Ресей мен Украина арасындағы келіссөздерде бетбұрыс сәтке айналуы мүмкін. Түркия тағы да бейтарап алаң ретінде ұсынылып отыр, ал АҚШ-тың қатысуы келіссөздерге қосымша саяси салмақ береді.
Саяси сарапшылардың айтуынша, Ресей мүмкіндігінше сұрақ тудырып тұрған территорияны бергісі келмейді, ал Украина өз егемендігі мен аумақтық тұтастығын қалпына келтіруге баса назар аударады. Бұл жағдай келіссөздерді күрделендіре түседі, бірақ оның нәтижесі елдер арасындағы болашақ қатынастар үшін шешуші болмақ.
Ауқымды басып кірудің бастауы
2022 жылдың 24 ақпанында Ресей Украинаға қарсы соғыс қимылдарын бастап, оны «арнайы әскери операция» деп атады. Мақсаты – «демилитаризация» және «денацификация» деп жарияланды. Сол күні Ресей Украинадағы әскери нысандарға соққы беріп, бірнеше бағыттан – Ресей аумағынан, Донбасс пен Қырымнан – құрлықтық шабуыл бастады. Шабуылдар қарқынды жүріп, алғашқы күндері ресейлік армия Киев, Харьков, Мариуполь сынды стратегиялық қалаларды басып алуға тырысты.
Украина агрессияға қарсы тұрып, мобилизация жариялап, аумақтарын белсенді түрде қорғады. Халықаралық қауымдастық Украина жағына шықты – Ресейге қарсы жаппай санкциялар енгізілді, ал Киевке ЕО, АҚШ және басқа да одақтастар тарапынан гуманитарлық әрі әскери көмек көрсетілді.
Салдары
Шабуыл басталғалы бері соғыс көптеген адамның өмірін жалмап, жойқын қираулар мен миллиондаған босқындарға себеп болды. Ресейге қарсы халықаралық санкциялар енгізілді, ал Украинаға Батыстан гуманитарлық және әскери көмек көрсетілуде. Бітімге келу мен бейбіт келіссөздерге бағытталған бірнеше талпыныстарға қарамастан соғыс әлі де жалғасуда.
Қақтығыс күн өткен сайын шиеленісіп, Еуропа мен бүкіл әлемдегі тұрақтылыққа қатер төндіруде.
