Шерзат Полаттың қазасына қатысты іс: қорғаушы тарап сотты Алматыға ауыстыруды сұрайды
2025 жылы 17 сәуірде Талдықорғанда 2024 жылдың қазан айында Талғардағы 16 жастағы Шерзат Полаттың өліміне қатысты іс бойынша сот отырысы басталды, – деп хабарлайды Taspanews.kz.
Қазір сот Жетісу облысында өтуде. Іс бойынша айыпталушылардың қорғаушылары сот отырысын Алматыға көшіру туралы өтініш берді. Олар қорғау үшін дұрыс жағдайды қамтамасыз ету қажеттілігін түсіндірді.
"Айыпталушылар орналасқан Талдықорған қаласында олармен кездесу қиынға соғады, себебі кіруге мүмкіндік шектеулі. Сотты Алматыға көшіру оларға ғана емес, жәбірленуші тарапқа да ыңғайлы болады. Бұл қысымды азайтады және істі объективті қарауға жағдай жасайды",
– деді олар.
Алайда судья Ержан Жанұзақов сот отырысына дейін айыпталушымен кездесуге мүмкіндіктері бар екенін, соттың өзі Талдықорғанда жалғасатынын айтып, адвокаттардың өтінішін қанағаттандырмады.
Айыпталушылар қатарында тоғыз адам. Оның ішінде бір кәмелетке толмаған бала бар. Ешқайсы күнәсін мойындамады.
