Шерзат Болат ісі бойынша айыпталушы тергеу кезінде азаптауға ұшырағанын мәлімдеді
2025 жылғы 15 мамырда Шерзат Болатты өлтіру ісі бойынша сот отырысында айыпталушы Нұрбол Тоқтаубаев құқық қорғау органдары қызметкерлері тарапынан қатты қысым мен физикалық зорлық көріп, мәжбүрлі түрде жауап бергенін айтты, – деп хабарлайды KazTaspa.kz.
Ол бұл жауаптар адам төзгісіз жағдайда алынғандықтан, олардан бас тартқанын атап өтті.
Басына пакет кигізіп, ұрып-соққан
Тоқтаубаевтың айтуынша, тергеу кезінде оның жанында адвокат болмаған және іс материалдарымен танысу мүмкіндігі де болмапты. Ол ҰҚКБ пен жедел қызметкерлердің қорқытып, белгілі бір жауаптарды айтуға мәжбүрлегенін, соның ішінде Азамат есімді бауырына жала жабуға итермелегенін баяндады.
«Маған басыма пакет кигізіп, ішімнен ұрды, жақ сүйегімді сындырды. Мұның бәрі камерасыз жерде болды. Ағамды да ұрды. Мен қатты күйзеліске түстім, қорықтым»,
Жауаптардан бас тарту және айғақтарды қайта қарау
Нұрбол Тоқтаубаев бұрынғы мойындау жауаптарынан бас тартып, туысына қарсы куәлік бермеу құқығы бар екенін білмегенін айтты. Сондай-ақ, ол ағасының қолында пышақ болғаны туралы ақпаратты жоққа шығарды.
Шерзат Болат ісі бойынша сот процесі жалғасуда. Тергеу мен сот органдары айыпталушылардың құқықтары бұзылған-бұзылмағанын және дәлелдердің қаншалықты шынайы екенін анықтап жатыр.
Еске салайық, қанды оқиға 2024 жылғы 4 қазанға қараған түні Талғар қаласында болған. Дүкендердің бірінің жанында жастар арасында төбелес шығып, оның барысында 16 жастағы жасөспірім Шерзат Болат пышақ жарақатынан көз жұмды. Тағы екі адам ауыр жарақатпен ауруханаға түсті.
Іс бойынша айыпталушылар күнәсін мойындаған жоқ.
