«МӘМС-ті қаралады» – Мәжіліс депутатына сотқа шағым түсті

Қазақстан Республикасы Парламенті Мәжілісінің депутаты Бақытжан Базарбекке бірнеше медициналық ұйым сотқа шағым түсірді. Бұған оның міндетті әлеуметтік медициналық сақтандыру (МӘМС) жүйесіне айтқан өткір сыны себеп болған, деп хабарлайды KazTaspa.kz.

Депутат сөзі сараптамадан өтеді

Депутаттың айтуынша, сот лингвистикалық сараптама тағайындады – мамандар оның сөзін зерттеп, айтқандары қорлау ма, жоқ па екенін анықтамақ.

«Сараптаманы Әділет министрлігіне қарасты Сот сараптамасы орталығы жүргізеді. Медициналық ұйымдар өз қорытындыларын ұсынды. Денсаулық сақтау министрлігі бұл істе үшінші тарап ретінде тіркелгенімен, әзірге бейтарап ұстанымда. Қысым сезіп жүрген жоқпын, жағдай тыныш», – деді Базарбек Мәжіліс кулуарында журналистерге.

Неліктен медициналық ұйымдар депутатқа ренжіді

Бақытжан Базарбек бұған дейін бірнеше рет МӘМС қорындағы қаражаттың мақсатсыз жұмсалатынын айтып, мұндай заң бұзушылықтар үшін ешкім жауап бермейтінін сынға алған. Ол сондай-ақ Жоғарғы аудит палатасын да сынаған – мекеме заң бұзушылықтарды анықтаса да, «ұрлық» деген сөзден қашып, «бюджетті тиімсіз пайдалану» деп жұмсартып айтатынын айтқан.

Депутаттың қоғамдық мәлімдемесі үшін сотқа тартылуы – елімізде сирек кездесетін жағдай. Бұл іс қоғам мен сарапшылардың да назарын аударды.

Айта кетейік, Денсаулық сақтау министрлігі бұл іске қатысты әзірге ешқандай пікір білдірген жоқ.