Қазақстандық азамат салымшыларды миллиардтаған теңгеге алдап Лондонға қашып кетті
Қазақстандық азамат салымшыларды миллиардтаған теңгеге алдап, Лондонға қашып кетті
Sax Invest қаржы пирамидасының ұйымдастырушысы Сәтжан Мендығалиев қазақстандықтардан 9 миллиард теңгеден астам ақша жинап, бұл қаржыны түгелге жуық өз қажетіне жұмсаған – жеке пәтерлер алып, қымбат сапарларға барып, казиноға бәс тіккен, деп хабарлайды KazTaspa.kz.
Салымшылардың ақшасы қайда жұмсалды?
Қаржылық мониторинг агенттігінің мәліметіне сай, Мендығалиев 2 миллиард теңгеден астам қаражатты казинода ұтылып қалған. Тағы 30 миллион теңгені «Блайсико» фирмасына инвестициялаған, ал Атыраудағы жылжымайтын мүлікке шамамен 70 миллион теңге жұмсаған. Сонымен қатар, ол 120 миллион теңгеге үй салып, қызының Лондонда оқуы үшін 53 миллион теңге төлеген.
Сондай-ақ, шетелге жасаған сән-салтанатты демалыстары үшін шамамен 380 миллион теңге кеткен.
Уәделер, ақшаны қайтару және халықаралық іздеу
2023 жылдың басында Мендығалиев салымшыларды тыныштандыруға тырысып, ақшаның бір бөлігін қайтару туралы келісімшарттарға қол қойған. Ол 7 миллиард теңгеден астам қаражатты қайтарамын деп уәде берген, бірақ бұл уәдесін орындамаған. 2024 жылдың қарашасында ол халықаралық іздеуге жарияланды.
Қазір күдіктінің 600 миллион теңгеге жуық мүлкі – пәтерлер, үйлер, автокөліктер, криптовалюта және Қазақстанның ірі банктеріндегі құнды қағаздар – тәркіленіп, бұғатталған.
Алаяқтық ісі бойынша елдің бірнеше қаласында пирамиданың жұмысын ұйымдастырған 10 адам тергеуге алынды. Олардың жетеуі ұсталып, қамауда отыр.
