Мейрамханалар мен отшашуларсыз: Қазақстанда Соңғы қоңырау өткізу ережелері еске түсірілді
Қазақстандық оқушылар мектеппен қоштасатын уақыт таяп қалды. Алайда бұл мереке аниматорларсыз, мейрамханаларсыз және фейерверктерсіз өтеді. Билік өкілдері Соңғы қоңырауды өткізуге қатысты толық тыйымдар тізімін жариялады, – деп хабарлайды KazTaspa.kz.
Оқу-ағарту министрлігінің өкілдері ата-аналардан ақша жинауға қатаң тыйым салынатынын ескертті.
Тыйым салынады:
аниматорлар мен мерекелік іс-шараларды ұйымдастыратын агенттіктерді жалдауға;
мұғалімдерге сыйлықтар мен дастархан әзірлеуге;
автокөлік жалдауға және қала бойынша серуендеуге;
мейрамханаларда, кафелерде немесе ойын-сауық мекемелерінде шара өткізуге;
отшашу пен пиротехника қолдануға;
жабдықталмаған жерлерде шомылуға.
Егер сынып табиғатқа серуендеуді жоспарласа, міндетті түрде мектеп әкімшілігінен, ата-аналардан рұқсат алыну керек және полицияға хабарлау керек. Серуен кезінде жауапты мұғалім, медицина қызметкері және полиция қызметкері болуы тиіс. Сондай-ақ, көлік техникалық байқаудан өтуі керек.
Қауіпсіздік шаралары күшейтілді
Соңғы қоңырау күні әр мектепке полиция қызметкерлері бекітіледі. Бейнебақылау күшейтіліп, оқушылармен, ата-аналармен және ұстаздармен түсіндіру жұмыстары жүргізіледі.
Кәсіпкерлерге ескерту жасалды: түлектерге алкоголь сату — қатаң тыйым салынған іс. Түнгі уақытта полиция рейдтер жүргізіп, ата-анасыз жүрген жасөспірімдерді тексереді.
Іс-шара өткізілетін әрбір орын өрт сөндіргіш құралдармен жабдықталуы тиіс. Жауапты адамдар өрт қауіпсіздігі талаптарының сақталуын бақылауға міндетті. Төтенше жағдай орын алса, 101 немесе 112 нөмірлеріне хабарласу қажет.
