Қазақстанда дауылды ескерту жарияланды
2025 жылғы 19 мамыр, дүйсенбі күні Қазақстанның 13 өңірінде дауылды ескерту жарияланды "ҚазГидроМет" РМК қауіпті ауа райы құбылыстары — нөсер жаңбыр, дауылды жел, бұршақ, найзағай туралы хабарлайды. Сонымен қатар, бірқатар аймақтарда жоғары және төтенше өрт қаупі сақталады, деп хабарлайды KazTaspa.kz.
Жетісу облысы
19 мамыр күні таулы аймақтарда нөсер жаңбыр жауады. Облыстың орталық және таулы бөліктерінде найзағай, бұршақ, дауылды жел (28 м/с дейін) күтіледі. Талдықорғанда жел екпіні – 20 м/с дейін. Оңтүстік аудандарда — жоғары, солтүстікте — төтенше өрт қаупі сақталады.
Қарағанды облысы
Түнде солтүстік пен шығыста нөсер жаңбыр, бұршақ және дауыл күтіледі. Солтүстік-батыс желі 28 м/с дейін күшейеді. Қарағандыда – қатты жаңбыр, найзағай және екпінді жел болады.
Алматы облысы
Түнде оңтүстік және таулы аудандарда найзағай мен дауылды жел күтіледі. Кей жерлерде бұршақ болуы мүмкін. Алматы қаласында — найзағай, бұршақ және түнде дауыл. Қонаев қаласында – дауылды жел.
Жамбыл облысы
Таулы аймақтарда найзағай, бұршақ және дауыл күтіледі. Өңірдің солтүстігі мен оңтүстігінде шаңды дауыл болуы мүмкін. Жел 23 м/с дейін жетеді. Таразда — желдің күшеюі 20 м/с дейін болады.
Ұлытау облысы
Облыстың шығысында түнде найзағай күтіледі. Түнде желдің күші 28 м/с дейін жетеді. Жезқазғанда — дауылды жел және төтенше өрт қаупі сақталады.
Маңғыстау облысы
Солтүстік-батыста найзағай, орталық және батыс бөліктерінде шаңды дауыл күтіледі. Оңтүстік желі 20 м/с дейін күшейеді. Ақтауда — өрт қаупі жоғары, жел екпіні 18 м/с дейін.
Ақтөбе, Қызылорда, Ақмола облыстары
Бұл өңірлерде жауын-шашын күтілмейді, бірақ әсіресе оңтүстік және батыс аудандарда төтенше өрт қаупі сақталады.
Түркістан облысы
Таулы аймақтарда найзағай, асуларда жел 20 м/с дейін жетеді. Солтүстік және шөлді аудандарда өрт қаупінің ең жоғары — 5-классы сақталады.
Атырау облысы
Батыс, оңтүстік және шығыс бөліктерінде найзағай мен бұршақ күтіледі. Атырау қаласында оңтүстіктен соққан жел екпіні — 18 м/с. Облыстың оңтүстігінде төтенше өрт қаупі бар.
Абай және Шығыс Қазақстан облыстары
Қатты жаңбыр, бұршақ, дауыл және найзағай болжанады. Жел 28 м/с дейін күшейеді. Семей мен Өскеменде — найзағай және екпінді жел күтіледі.
Қазгидромет ұсынады:
Таулы және ашық жерлерге сапарға шықпаңыз;
Ағаштардан, электр желілерінен және бекітілмеген құрылыстардан аулақ болыңыз;
Өрт қауіпсіздігі шараларын күшейтіңіз.
