eGov Mobile қосымшасында алаяқтардан қорғайтын «қалқан» пайда болды
eGov Mobile қосымшасындағы жаңа Nomad Guard сервисі қазақстандықтарды онлайн-алаяқтардан қорғайды, деп хабарлайды KazTaspa.kz Fingramota.kz сайтына сілтеме жасап.
Киберқатерлер мен жеке деректердің таралуы артып жатқан қазіргі уақытта Қазақстанда Nomad Guard атты тегін цифрлық сервис іске қосылды. Ол eGov Mobile қосымшасында қолжетімді және азаматтарға интернет-алаяқтардан қорғануға көмектеседі.
Nomad Guard қалай жұмыс істейді?
Сервис арқылы сіз:
кез келген күмәнді сілтемені немесе сайтты тексере аласыз;
жеке деректеріңіздің желіге таралғанын анықтай аласыз;
қай сайттан және қандай көлемде ақпарат тарағанын көре аласыз;
күмәнді әрекет туралы тікелей қосымша арқылы шағым түсіре аласыз.
«Егер сіз қандай да бір сілтемеге кіруге күмәндансаңыз — оны Nomad Guard-қа енгізіңіз, сервис сізге қорытындыны көрсетеді». Сонымен қатар, сіз өзіңіздің жеке ақпаратыңыз интернетке тарап кетті және қандай ресурстардан тарап кетуі мүмкін екенін біле аласыз. Жүйе қандай деректердің тарап кеткенін және қандай көлемде екенін көрсетеді. Егер сіз күдікті нәрсені байқасаңыз-бұл туралы арнайы форманы толтырып, қосымша арқылы хабарлауға болады",
Nomad Guard қызметін қалай пайдалануға болады?
Сервис іске қосылу үшін:
eGov Mobile қосымшасына ЭЦҚ немесе биометрия арқылы кіріңіз;
«Басқа сервистер» бөліміне өтіңіз;
«Тексеру» бөлімін таңдаңыз;
Тексергіңіз келген сайттың немесе ресурстың сілтемесін енгізіңіз;
Нәтижелерді «Менің тексерулерім» бөлімінен қараңыз.
Басты бетте деректер тараған сайттар мен рұқсатсыз тарап кеткен ақпарат көлемі көрсетіледі. «Алаяқтық» қойындысында шағым жіберуге немесе күмәнді әрекеттер туралы хабарлауға болады.
Неге бұл маңызды?
Жеке деректеріңізді қорғау — өз қауіпсіздігіңізді қамтамасыз етудің негізі. Егер бұл деректер алаяқтардың қолына түссе, оларды түрлі қылмыстық схемаларда пайдалана алады.
«Ең көп таралған тәсілдердің бірі — нөмірді ауыстырып қоңырау шалу. Олар банк немесе мемлекеттік орган қызметкері ретінде хабарласып, деректерді сұрауы мүмкін. Есте сақтаңыз: нағыз банктер бірінші болып ешқашан қоңырау шалмайды. Мұндай жағдайда тұтқаны қойып, ештеңе айтпаңыз»,
Статистикаға сәйкес, банк картасымен жасалған алаяқтықтың 95%-дан астамы пайдаланушылардың өз кінәсінен болады — олар SMS-кодтарды, картаның деректерін немесе парольдерді өз еркімен береді.
Кейде алаяқтар салық органдары немесе прокуратура атынан жалған хаттар жібереді, кейін хабарласып, мәселені «бейбіт жолмен шешуді» ұсынады – яғни ақша талап етеді. Ескерту: пара беру — қылмыс, әрі бұл мәселені шешпейді, керісінше, жаңасын тудырады.
Алаяқтар жиі әлеуметтік желілер мен мессенджерлерді пайдаланады. Кейде достарыңыздың атынан «ақша бере тұршы» деген хабар келеді – бірақ бұл бұзылған аккаунт болуы мүмкін. Немесе «сауалнамаға қатысып, сыйлық алыңыз» деп, карта деректерін енгізуді сұрайды. Осылайша адамдар өз ақшасын өздері береді.
Алданбау үшін есте сақтаңыз:
Ақша сұраған адамға міндетті түрде қоңырау шалыңыз;
Күмәнді сілтемелерге өтпеңіз;
Кодтарыңызды немесе карта деректерін ешкімге айтпаңыз.
Кез келген күмәнді сайтты Nomad Guard арқылы тексеріңіз — бұл тегін, оңай және қаржылық қауіпсіздігіңізді сақтауға көмектеседі.
