Алматыда шілдеге дейін көлік қозғалысы қай көшелерде шектеледі?
Алматыда 40 жылдан астам уақыт бойы жер астында жатқан ескі жылу желілерін ауыстыру бойынша шұғыл жұмыстар басталды. Осыған байланысты Алмалы ауданындағы бірнеше көшеде көлік қозғалысы уақытша шектеледі, – деп хабарлайды KazTaspa.kz қала әкімдігінің баспасөз қызметіне сілтеме жасап.
Билік өкілдері қала тұрғындарын маршруттарын алдын ала жоспарлауға және жолда мұқият болуға шақырады.
3 маусымнан 6 шілдеге дейін келесі учаскелерде қозғалыс жабылады:
Айтиев көшесі – Бөгенбай батыр көшесінен Төле би көшесіне дейін;
Қазыбек би көшесі – Чокин көшесінен Исаев көшесіне дейін.
Шектеу қою екі бағытта да жүргізіледі.
«Жұмыстар қысқы жылыту маусымына дайындық аясында жүргізілуде – бұл учаскелерде 1978–1989 жылдары төселген құбырлар ауыстырылады. Жалпы бір шақырым жылу желісі жаңартылып, 13 көпқабатты тұрғын үй тұрғындары қыс мезгілінде тұрақты жылумен қамтамасыз етіледі»,
2025 жылы Алматыда жалпы ұзындығы 39 шақырым болатын құбыр желілерін қайта жаңарту жоспарланған. Бұл шаралар қаладағы жылу жүйелерінің тозу деңгейін 54%-ға дейін төмендетіп, қыс кезінде болатын апаттар мен жылусыз қалуды азайтуға мүмкіндік береді.
